Мамыр айының басталуымен елордада халықаралық музыкалық фестиваль — «Опералия» қайтадан есігін айқара ашады. 16 мамырда «Астана Опера» сахнасында бастау алатын фестиваль 13 шілдеге дейін жалғасады. Осы уақыт ішінде елдің басты театрының сахнасында жарқын опералық және балеттік қойылымдар, сонымен қатар қызықты концерттік бағдарламалар ұсынылады. ҚР Мәдениет және ақпарат министрлігінің қолдауымен өтетін фестиваль аясында Италия, Болгария, Қытай, Моңғолия, Ресей және, әрине, Қазақстаннан келген әртістердің басын қосатын 30-дан астам шара өткізіледі.
«Опералия-2025» екі ай бойы мәдениет марафонына айналады — әр кеш өзінше ерекше өтеді. Бұл – «Астана Опера» театрының аталған жиырма жылдан астам тарихы бар фестивальді үшінші жыл қатарынан қабылдауы.
Әйгілі дирижерлер — Алан Бүрібаев, Абзал Мұхитдин, Джузеппе Аккуавива, Руслан Баймұрзин, Арман Уразғалиев және Элмар Бүрібаев музыкалық кештердің әрқайсысына өзіндік бояу беріп, кезекпен дирижерлік етеді.
Фестиваль 16–17 мамыр күндері Ролан Петидің «Арлезианка», «Жігіт пен өлім», «Кармен» атты бір актілі балеттерінің керемет премьерасымен ашылады. Бұл құмарлық пен шеберліктің үйлесімі фестивальдің жалпы атмосферасын айқындайды. Артынша түрлі қойылымдар мен концерттер шеруі жалғасады: 20 мамырда С. Мұхамеджановтың «Айсулу» комикалық операсы, 23 мамырда театрдың жетекші солисі Мәдина Өнербаеваның шығармашылық кеші, 24–25 мамырда балаларға арналған ертегілер – Ц. Кюидің «Етік киген мысық» және 1–2 маусымда Р. Ребектің «Золушка» қойылымдары.
6 маусымда Ж. Бизенің әйгілі «Кармен» операсы қойылады. Онда Хозе партиясын ресейлік Дмитрий Головнин орындайды. 8 маусымда көрермендерге «Nomad Inspiration» атты ерекше жоба ұсынылады — бұл «Астана Опера» мен HasSak этно-фольклорлық ансамблінің бірлескен туындысы.
Фестиваль түрлі сахналарда өтеді — Үлкен залдан Камералық және Мәрмәр залдарға дейін. Қ. Байсейтова атындағы Камералық залда концерттер шеруі өтеді: болгариялық скрипка шебері Павел Миневтен бастап, виолончель кештеріне дейін (Салауат Карибаев және Алияp Өтетлеу қатысады). Сондай-ақ, фортепиано, оркестр және опера өнеріндегі шеберлер өнер көрсетеді.
«Опералия-2025» фестивалі — әлемдік және қазақстандық өнердің жарқыраған гауһар тастарына толы!
