17 наурыз – Мәдениет және ұлттық салт-дәстүр күні қарсаңында Еркеғали Рахмадиев атындағы Мемлекеттік академиялық филармонияның Камералық хоры қазақ халқының өмірлік философиясын сахна төрінде жаңғыртты.

Театрландырылған хор қойылымы – күй мен әннің, көркем сөз бен дәстүрдің, сахна мен шынайы өмірдің үйлесімі. Қазақ халқының ғасырлар бойғы ғұрыптарын көрермен жүрегіне жеткізген хор әртістері ұлттық нақыштағы әндермен салтанатты кештің сәнін ашты.

Бұл кеште Дәулеткерей, Құрманғазы, Е. Хасанғалиев сынды композиторлардың шығармалары орындалып, хордың жеке орындаушылары өз өнерін паш етті. Қойылым көрерменге халқымыздың кеңпейілдігі мен ұлттық болмысын тереңнен сезінуге мүмкіндік берді.

Ұлттық мәдениет пен өнерге тағзым ретінде ұсынылған бұл кеш – өткеннің аманаты, болашаққа ұмтылған қадам.