Батыржан Смақов – Қазақ ұлттық өнер университетінің хор дирижері, Қазақстандағы жалғыз опера әншісі – контртенор.
Батыржан 1986 жылы Қарағанды қаласында дүниеге келген, бала кезінен музыкамен айналыса бастаған. Оның кәсіби мансабы 2010 жылы басталды, сол кезде ол алдымен Грузияда, кейін Италияда білім алды. 2011-2017 жылдары Озимо қаласындағы Халықаралық опера әншілері академиясында, кейін Пезаро қаласындағы Джоаккино Россини атындағы консерваторияда хор дирижерлігі мамандығы бойынша оқыды, Италия магистратурасын қызыл дипломмен аяқтады. 2016 жылы Сирия балаларына көмек көрсету мақсатында өткізілген қайырымдылық концерттері үшін ЮНЕСКО-ның «Бейбітшілік әртісі» атағына ие болды. Оқу аяқталған соң, елге жеңіспен оралып, «Астана Опера» театрында «Орфейдің оралуы» атты екі жеке концертін өткізді. 2018 жылы «Қазақстанның 100 жаңа есімі» жобасының жеңімпазы атанды. 2024 жылы Мәскеудегі «City Business School» оқу орнында Intensive MBA магистратурасын тәмамдады. Италия Жұлдыз орденінің кавалері. Санкт-Петербургтегі «Гран-при» және Туриндегі «Concorso della Musica Sacra» сынды халықаралық байқаулардың лауреаты.
Қазақ мемлекеттік симфониялық оркестрінің (Қазахконцерт) әкімшісі, Қазақ ұлттық өнер университетінің «Дирижерлау» кафедрасының аға оқытушысы, «Астана Опера» театрының шақырылған солисі, «Жастар» хорының көркемдік жетекшісі және дирижері, Көкшетау облыстық филармониясының солисі, сондай-ақ Нью-Йорктегі Global Music Partnership ұйымының шақырылған дирижері. Дубайдағы MECMA халықаралық академиясының шақырылған профессоры. Италия, Франция, АҚШ, Египет, Иордания, Ресей, Польша, БАӘ және басқа елдерде концерттер береді. Халықаралық байқаулардың қазылар алқасының мүшесі: «Жас Дарын» (Қазақстан), «Tanysu» (Сан-Марино), «Jumeirah Sounds» (БАӘ), «Suoni di Venezia» (Италия), «Young Talents World Festival» (Нью-Йорк), «Sanremo Junior Kazakhstan». Қазақ музыкасын шетелде насихаттаумен белсенді айналысады. Қазақстан Композиторлар одағының және Қазақстан музыкалық қайраткерлер одағының мүшесі. Дискографиясында төрт жеке альбомы бар. Хор дирижерлау бойынша «Дайдидау» хрестоматиясы сияқты бес ноталық жинақтың құрастырушысы.
