Жиенғалиева Ардақ Қанатбекқызы – педиатр дәрігер, PhD докторант (2 курс), «Астана медицина университеті» КЕАҚ қалыпты физиология кафедрасының аға оқытушысы.
Жоғары өнердің үлкен жанкүйері. «Астана Опера» және «Астана Балет» театрларының тұрақты көрермені.
Тажибаева Дамира Сабырқызы – медицина ғылымдарының докторы, профессор, В.Г.Корпачев атындағы патологиялық физиология кафедрасының меңгерушісі, «Астана медициналық университеті» КЕАҚ. Өз өмірін болашақ дәрігерлерді емдеу өнеріне үйретуге арнаған жан. Жоғары өнерді бағалайтын, біздің әртістерге деген махаббат пен адалдықты одан әрі арттыратын тұлға.
2025 жылғы 18 қаңтарда менің ұстазым, медицина ғылымдарының докторы, профессор, В.Г.Корпачев атындағы патологиялық физиология кафедрасының меңгерушісі Тажибаева Дамира Сабырқызымен бірге «Астана Опера» театрының прима-балеринасы, Қазақстанның еңбек сіңірген қайраткері Айгерім Бекетаева және талантты Диас Құрманғазының қатысуымен өткен «Аққу көлі» спектаклін тамашалап, биік әрі мәңгі өнерді көрдік.
«Аққу көлі» балеті – биік әрі мәңгілік өнердің айқын үлгісі. Сахнада қайталанып жатқан көріністер әрқашан құмарлық тудырады: толқыныс, нәзіктік пен шексіз махаббат, таңданыс пен таңғалыс. 2025 жылғы 18 қаңтарда өткен спектакльде «Астана Опера» театрының сахнасында Одетта мен Одилия рөлдерін әлемдегі үздік балерина Айгерім Бекетаева – Қазақстанның еңбек сіңірген қайраткері орындады. Айгерім Бекетаева шексіз талантқа ғана емес, сонымен қатар балет өнеріне деген таңғаларлық адалдық пен берілгендікке ие. Ол үшін би – тек техника ғана емес, ол – өмір философиясы, оның жаны. Бүгін бидің өзі туралы емес, балеринаның шеберлігі мен руханилығы туралы емес, біз – Терпсихора өнерінің жанкүйерлері әр көрініс кезінде сезінген шексіз тебіреніс, сүйсіну, көз жасымен бірге келген шаттық туралы айтқымыз келеді. О!!! Бұл өнер аспанға көтеріп, жанымызда шынайы әрі ұлының бар екенін сездіретін құдірет.
Айгерім Бекетаева – басқа өлшемнің балеринасы, қазақ балетінің данышпаны! Ол биіне толығымен берілген: оның қозғалыстары үзілмейді, аяқталмайды, біртіндеп бәсеңдеп, ауада еріп кетіп, кейіпкерлердің ішкі жан дүниесін бейнелейді. Біз Айгеріммен бірге кейіпкерлердің көңіл-күйінің барлық реңктерін, жанның елеусіз, аңғал серпілістерін сезінеміз. Айгерім Бекетаеваның орындауындағы Одетта мен Одилия партиялары әрқашан ерекше қабылданады: спектакльден спектакльге терең мәнге толығып, жетіліп, оның данышпандығы мен қажырлы еңбегінің арқасында жаңарады.
Оның серіктесі Зигфрид рөлінде тамаша, шексіз талантты Диас Құрманғазы болды. Оның қозғалыстарының сиқыры, «ұзақ» ұшуы мен бидің қуанышы, икемді бұрылыстары жас ханзаданың шынайы махаббатын бейнеледі және зұлымдықты жойды.
Балет труппасының барлық әртістеріне шеберліктің тамаша, мінсіз үлгісін көрсеткені үшін алғыс айтамыз. Өмірді биден көрсете білгендеріңіз үшін рақмет!
