Бүгін Бейжіңде Қазақстанның Мәдени орталығы ашылды. Бұл оқиғаны Президент Қасым-Жомарт Тоқаев халықтарымыз арасындағы рухани байланыстарды нығайтуға бағытталған маңызды қадам деп орынды атап өтті.

Мемлекет басшысы мәдениет пен өнер елдерді өзара құрмет пен шығармашылық арқылы біріктіретін берік көпір қызметін атқаратынын айтты. Өткен жылы Астанада Бейжің тіл және мәдениет университетінің филиалы ашылса, енді осы сапар аясында Лу Бан шеберханалары іске қосылды. Мұның бәрі — ынтымақтастығымызды жүйелі әрі ұзақмерзімді ететін ауқымды мәдени-ағартушылық диалогтың бір бөлігі.

Тоқаевтың айтуынша, Қазақстан мен Қытай «ынтымақтастықтың екінші алтын отыз жылдығына» қадам басты. Бұл жай ғана әдемі сөз емес — жоғары деңгейдегі кездесулердің қарқыны, инвестициялардың өсуі және мәдени өзара іс-қимылдың жандана түсуі осының нақты дәлелі.

Бейжіңдегі Мәдени орталық қазақ мұрасын насихаттайтын, жастар арасындағы диалогқа, идея алмасуға және бірлескен жобаларды дамытуға арналған алаңға айналады. Өйткені руханият — халықтың өмір салтының көрінісі, оны нығайту — қоғамдарды жақындастырудың ең тиімді жолы.

Бұл — Қазақстанның шынайы «жұмсақ күші», яғни біздің үніміз мәдениет, білім және дәстүрге құрмет арқылы естіліп, түсінікті бола түскен сәт.

Ізгі ниетпен,
Импресарио,
Мәдени мұра қорының президенті
Эльбрус Имамбаев