Қолжазба «Хандар шежіресі» ЮНЕСКО-ның «Память мира» халықаралық тізіміне енді.

Бұл туралы Қазақстан Республикасының Мемлекеттік кеңесшісі Ерлан Қарин өзінің Telegram-арнасында хабарлады, деп жазады El.kz ақпарат агенттігі.

«Хандар шежіресі» қолжазбасы ЮНЕСКО-ның «Память мира» халықаралық тізіліміне енді. Бұл туралы Мемлекеттік кеңесші Ерлан Қарин хабарлады. Оның айтуынша, Ұлттық құрылтайдың төртінші отырысында Президент Қасым-Жомарт Тоқаев еліміздің бірегей деректі мұрасын сақтау жұмыстарын күшейтуді тапсырған.

XVIII ғасырға жататын бұл бірегей құжат — ұзындығы үш метрден асатын шиыршық түріндегі қолжазба. Онда VI ғасырдан XIX ғасырға дейінгі қазақ хандары мен билеушілерінің егжей-тегжейлі шежіресі баяндалған. Бұл тарихи жәдігер — қазақ тарихындағы танымал тұлғалардың шығу тегін, сондай-ақ олардың Еуразия халықтарымен байланысын тереңірек түсінуге мүмкіндік беретін аса құнды дереккөз.

«ЮНЕСКО мойындаған бұл құнды жәдігер — қазақ даласының билеушілерінің терең тамырын көрсететін айғақ. Ол тарихи тұлғалардың шығу тегін, басқа халықтармен байланысын, әсіресе VI ғасырдан XIX ғасырға дейінгі кезеңді түсінуге септігін тигізеді», — деп атап өтті Ерлан Қарин.

Айта кетейік, бұған дейін ЮНЕСКО-ның халықаралық тізіліміне Қазақстан атынан Қожа Ахмет Ясауи қолжазбалары, «Невада-Семей» халықаралық ядроға қарсы қозғалысының мұрағаты және Арал теңізіне қатысты мұрағаттық материалдар енген болатын.