Әлемге әйгілі композитор және пианист Стив Баракатт Халықаралық әйелдер күніне орай «Астана Опера» сахнасында өнер көрсетті, деп хабарлайды Kazinform агенттігі ҚР Мәдениет және ақпарат министрлігінің баспасөз қызметіне сілтеме жасап.
Онымен бірге сахнаға 125 музыкант, вокалист және балет әртісі шықты. Стив Баракатт «Астана Опера» Үлкен залында өз шығармаларын ұсынған алғашқы солтүстік америкалық композитор және пианист атанды.
– Бұл концерт симфониялық оркестр, балалар хоры және «Астана Опера» балет труппасы қатысқан көпқырлы өнер ынтымақтастығы болды. Концертті дирижер Елмар Бурибаев басқарды, – деп атап өтті министрлік өкілдері.
Néoréalité әлемдік туры аясында бағдарлама С. Баракаттың ең танымал шығармаларын, соның ішінде Néoréalité («Неореальность»), «Ұшамын», «Отан», «Ливанның самырсындары», «Бесік жыры» (ЮНИСЕФ әнұраны) және жоғары бағаланған Ad Vitam Aeternam симфониясынан үзінділерді ұсынды. Бұл концерт арқылы С. Баракатт бүкіл әлем әйелдерінің төзімділігіне, шығармашылығына және қосқан үлесіне құрмет көрсетіп, терең эмоциялық әрі шабыттандыратын тәжірибе қалыптастыруды көздейді.
Бұған дейін әлемге әйгілі композитор және пианист Стив Баракатт Қазақстанға алғаш рет келіп, «Астана Опера» сахнасында концерт қойған болатын. Kazinform агенттігінің тілшісіне берген эксклюзивті сұхбатында ол ел мен халық туралы өз әсерімен бөлісті.
