Құрметті достар, балет сүйер қауым! Егер балет әртісінің қарапайым күніндегі өміріне көз жүгірткіңіз келсе — «Балет нені үндемей жеткізеді?» спектаклінің премьерасы сізді бей-жай қалдырмайды.
Қазақстан Республикасының Мемлекеттік академиялық би театры Булат Аюхановтың бастамасымен құрылған театрдың 57-маусымын классика, тарих және сахналық өмірге жаңа көзқарас үйлескен мазмұнды бағдарламамен аяқтады.
Бірінші бөлім — дәстүр және сахна
Алғашқы бөлімде балет әртістері Батыс Еуропа композиторларының музыкасына қойылған классикалық нөмірлерді орындады. Сонымен қатар, Булат Аюхановтың аңызға айналған қойылымдары: Л. Минустың музыкасына қойылған «Пахита», Дж. Вердидің «Камелиялы ханымы», К. Сен-Санстың «Аққу» қойылды.
Сахнада тәжірибелі шеберлер мен Алматы хореография училищесінің түлектерінің қатар өнер көрсетуі ерекше қуантты. Олардың техникасы, пластикасы және сахналық қуаты — дәстүрдің жалғасып келе жатқанын көрсетті.
Екінші бөлім — «Балет нені үндемей жеткізеді?» спектаклі
Екінші бөлімде көрермендерге хореограф Олег Игнатьевтің идеясымен қойылған спектакльдің премьерасы ұсынылды.
Бұл дәстүрлі мағынада сюжеті бар балет емес, алайда оның ішкі ырғағы, қозғалысы және танымал сахналық көріністері бар. Ол труппаның өмірі жайлы баяндайды: спектакльден — таңғы жаттығуға, қайта спектакльге...
Спектакль көрермен залға қайта жайғасып жатқан сәтте-ақ сахнада басталып кетеді — артистер жаттығу жасап жатады. Бұл — көрерменді сахна сыртындағы өмірге тартатын ерекше режиссерлік әдіс.
Артистердің күнделікті жаттығулары: станоктағы экзерсис, зал ортасындағы адажио, бұрылыстар, секірулер, солистердің дайындықтары – барлығы сахнада бейнеленеді.
Гротеск кейіпкер
Спектакль бойы залда ерекше кейіпкер – швабрамен жүрген тазалаушы әйел көрініс береді. Бір сәтте ол сахнада жалғыз қалып, халатын шешіп, ішінен пуанты мен балет киімін шығарып, «Аққу көлі» балетінен музыка аясында билей бастайды. Бұл көрініс — пародия да, арманы бар адам бейнесі де.
Балет – тіпті кәсіби болмасаңыз да – адамды өзіне тартады.
Музыка
Спектакль П.И. Чайковский шығармаларына құрылған. Шығармалар қатарында: №2 симфония, «Орлеан қызы» операсынан үзінділер, «Ұйқыдағы ару» вальсі, «Рококо тақырыбына вариациялар», «Жыл мезгілдері» циклінен «Баркарола» мен «Қазан» пьесалары бар.
«Балет нені үндемей жеткізеді?» — сахна мен сахна сырты бөлінбейтін, үздіксіз қозғалыстағы әртіс өмірін жеткізетін қойылым.
Театр ұжымын 57-маусымның аяқталуымен шын жүректен құттықтаймыз! Артистерге, педагогтарға, қоюшы және техникалық топқа алғыс білдіреміз.
Бұл кеш – Чайковскийдің мерейтойлық жылының айқын бөлігіне айналды.
Сүйіспеншілікпен,
Ая Калиева
